Ovdasiidu » Barggut

Barggut

Diehtosuodjeáittardeaddji barggut lea meroštallon persovdnadiehtolágas (523/1999) sihke lágas diehtosuodjelávdegottis ja diehtosuodjeáittardeaddjis (389/1994).

Diehtosuodjeáittardeaddji bargun lea gieđahallat ja čoavdit heaggadieđuid ja kredihttadieđuid gieđahallama guoski áššiid nu mo persovdnadiehtolágas ja kredihttadieđuin (527/2007) mearriduvvo sihke dikšut eará máinnašuvvon lágáid dihtii šaddi bargguid. Áittardeaddjái gullá maiddái čuovvut dáid dieđuid gieđahallama oppalaš ovdáneami ja dahkat dárbbašlažžan geahččan álgagiid. Lassin áittardeaddji galgá fuolahit iežas doaibmasuorggi gulavaš dieđihandoaimmas sihke heaggadieđuid gieđahallamii laktáseaddji riikkaidgaskasaš oktasašbarggus.

Addit almmolaš bagadallama ja rávvema sihke bargat oktasašbarggu čanusjoavkkuiguin

Diehtosuodjeáittardeaddji dehalamos bargu lea váikkuhit ovddalgihtii registtardoalu lágalašvuhtii, ovddidit buori diehtogieđahallanvuogi ja eastit diehtosuodjeloavkidemiid dáhpáhuvvama. Guovddáš ulbmilin lea luohttámuša sihkkarastin heaggadieđuid gieđahallamis. Dása viggojuvvo ee. logaldallamiin skuvlendilálašvuođain ja bidjamin deattu telefonrávvemii. Stuorra mearkkašupmi lea maiddái čanusjoavkooktasašbarggus. Diehtosuodjeáittardeaddji doaimmahaga ovddasteaddjit oassálastet dákkár eará hálddahussurggiid ráđđádallangottiide ja bargojoavkkuide, maid barggus priváhtavuođa suoji mearkkašupmi lea stuoris. Diehtosuodjeáittardeaddji lea bagadallandoaimmas ollašuhttima dihtii hábmen iešguđet doaibmasurggiide máŋggaid bissovaš oktasašbargojoavkkuid.

Dahká čovdosiid

Diehtosuodjeáittardeaddji bagadallá ja bivdagis rávve registtardoalliid ja registrerejuvvon ovttaskasdáhpáhusain sihke bargá čealkámušaid. Jos registtardoalli ii čuovo diehtosuodjeáittardeaddji bagadallama, diehtosuodjeáittardeaddji sáhttá buktit lágavuostásažžan árvvoštallan meannudeami diehtosuodjelávdegotti gieđahallama láhkai. Diehtosuodjeáittardeaddji sáhttá maiddái almmuhit ášši áššáskuhttima várás. Lassin son dahká čovdosiid registrerejuvvon vuoigatvuođaid ollašuvvamis. Dárkkistanvuoigatvuođa ollašuhttima ja dieđu vuigema guoskavaš áššiin mearrádusat leat čatni ja váidingelbbolaččat.

Bagadallá geavatnjuolggadusaid ráhkadeapmai

Registtardoallit sáhttet ráhkadit doaibmasuorgeguovdásaš geavatnjuolggadusaid buori diehtogieđahallanvuogi ovddideami dihtii. Diehtosuodjeáittardeaddji addá dárbbu mielde rávvagiid ja bagadallá geavatnjuolggadusaid ráhkadeamis sihke sáhttá dárkkistit ráhkaduvvon geavatnjuolggadusaid.

Bearráigeahččá ja dahká dárkkistemiid

Almmuhangeatnegasvuođa mielde diehtosuodjeáittardeaddji bearráigeahččá ovddalgihtii heaggadieđuid gieđahallama. Ee. muhtumiin heaggadieđuid automáhtalaš diehtogieđahallama mielde gieđahalli registtardoalliin, doaibmanaddimis diehtogieđahallama dikšuin sihke dihtolágan ealáhusdoaimmain bargiin lea geatnegasvuohta dahkat almmuhusa diehtosuodjeáittardeaddjái. Almmuhusa dahkan ii goitotge leat registtardoalu dahje doaimma dohkkehanmeannudeapmi.

Dárkkistandoaimma ulbmilin lea árvvoštallat diehtogieđahallama lágalašvuođa, oahpistit registtardoalliid, buoridit vuogádagaid dási sihke ovddalgihtii eastadit diehtosuodjeloavkidemiid. Dárkkisteami sisdoallu sáhttá molsašuddat ovttaskas oktavuohtaváldima dutkamis viiddis diehtogieđahallanproseassa čielggadeapmai.

Lea gullanláhkai ja addá čealkámušaid virgeoapmahaččaide, sivahalliide ja duopmostuoluide

Diehtosuodjeáittardeaddji galgá gullat dalle, go válmmaštallo priváhtavuođa ja heaggadieđuid suoji guoskavaš láhkaásahuslaš dahje hálddahuslaš ođastusat. Gullan ollašuvvá geavadis erenoamžit addimiin čealkámušaid ja oassálastimiin láhkaaddima válmmaštallama ja dárkkisteami várás ásahuvvon bargojoavkkuide. Virggálaš sivahalli galgá gullat diehtosuodjeáittardeaddji ovdal go son áššáskuhttá ášši persovdnadiehtolága vuostásaš mannudeamis. Ja vástideaddji láhkai duopmostuollu galgá dákkár ašši gieđahaladettiin várrret áittardeaddjái dilálašvuođa gullat. Áittardeaddji addá guktuin dáhpáhusain čealkámušaid.

Dieđiha

Diehtosuodjeáittardeaddji bohcciidahttá almmolaš ságastallama ja juohká informašuvnna, man čuozáhahkan leat riikkavulošat, virgeoapmahaččat ja eará registtardoallit. Diehtosuodjeáittardeaddji doaimmahaga dehalamaos diehtojuohkinkanála leat internet-siiddut www.tietosuoja.fi.

Doaibmá riikkaidgaskasaš oktasašbarggus

Diehtosuodjeáittardeaddji doaimmahat oassálastá oktasašbargui sihke Eurohppá uniovnna ja davviriikkaid dásis. Lassin áittardeaddji doaibmá globálain ja sierragážaldagaid vuođul ráhkaduvvon rikkaidviidosaš fierpmádagain.

 
Julkaistu 2.9.2015